John 3
លោកនីកូដេមជួបព្រះយេស៊ូដោយសំងាត់
1នៅពេលនោះមានបុរសម្នាក់មកពីខាងគណៈផារិស៊ីឈ្មោះនីកូដេមដែលជាអ្នកដឹកនាំរបស់ជនជាតិយូដា 2គាត់បានមកជួបព្រះយេស៊ូទាំងយប់ទូលថា៖ «លោកគ្រូយើងដឹងថាលោកជាគ្រូមកពីព្រះជាម្ចាស់មែនដ្បិតទីសំគាល់អស្ចារ្យដែលលោកកំពុងធ្វើទាំងនេះគ្មានអ្នកណាអាចធ្វើបានទេលើកលែងតែព្រះជាម្ចាស់គង់ជាមួយប៉ុណ្ណោះ» 3ព្រះយេស៊ូមានបន្ទូលឆ្លើយទៅគាត់ថា៖ «ខ្ញុំប្រាប់អ្នកជាពិតប្រាកដថាបើអ្នកណាមិនកើតជាថ្មីអ្នកនោះមិនអាចឃើញនគរព្រះជាម្ចាស់បានទេ»។ 4លោកនីកូដេមក៏សួរព្រះអង្គថា៖ «តើមនុស្សដែលចាស់ទៅហើយគេអាចកើតម្ដងទៀតយ៉ាងដូចម្ដេចបាន? គេមិនអាចចូលទៅក្នុងផ្ទៃម្ដាយរួចកើតមកម្ដងទៀតបានទេ»។ 5ព្រះយេស៊ូមានបន្ទូលថា៖ «ខ្ញុំប្រាប់អ្នកជាពិតប្រាកដថាបើអ្នកណាមិនកើតពីទឹកនិងព្រះវិញ្ញាណទេអ្នកនោះមិនអាចចូលទៅក្នុងនគរព្រះជាម្ចាស់បានឡើយ 6ដ្បិតអ្វីដែលកើតពីសាច់ឈាមនោះជាសាច់ឈាមប៉ុន្ដែអ្វីដែលកើតពីវិញ្ញាណនោះជាវិញ្ញាណ 7ដូច្នេះកុំឆ្ងល់ឡើយដែលខ្ញុំប្រាប់អ្នកថាអ្នកត្រូវកើតជាថ្មី 8ខ្យល់បក់ទៅទីណាតាមតែវាចង់ទៅហើយអ្នកឮស្នូររបស់វាប៉ុន្តែអ្នកមិនដឹងថាវាមកពីណាឬទៅណាទេរីឯអស់អ្នកដែលកើតពីព្រះវិញ្ញាណក៏ដូច្នេះដែរ»។ 9លោកនីកូដេមសួរព្រះអង្គទៀតថា៖ «តើការទាំងនេះអាចកើតឡើងយ៉ាងដូចម្ដេច?» 10ព្រះយេស៊ូមានបន្ទូលឆ្លើយថា៖ «អ្នកជាគ្រូរបស់ជនជាតិអ៊ីស្រាអែលហើយអ្នកមិនយល់ការនេះទេឬ? 11ខ្ញុំប្រាប់អ្នកជាពិតប្រាកដថាយើងប្រាប់ពីការដែលយើងបានដឹងហើយធ្វើបន្ទាល់ពីការដែលយើងបានឃើញប៉ុន្តែអ្នករាល់គ្នាមិនទទួលយកសេចក្ដីបន្ទាល់របស់យើងទេ 12ដូច្នេះបើខ្ញុំប្រាប់អ្នករាល់គ្នាអំពីរឿងហេតុលោកិយអ្នករាល់គ្នាមិនជឿទៅហើយចុះទម្រាំបើខ្ញុំប្រាប់អ្នករាល់គ្នាអំពីរឿងហេតុស្ថានសួគ៌វិញតើអ្នករាល់គ្នានឹងជឿយ៉ាងដូចម្ដេចបាន? 13មិនដែលមានអ្នកណាធ្លាប់ទៅដល់ស្ថានសួគ៌ទេមានតែព្រះអង្គដែលបានយាងចុះពីស្ថានសួគ៌ប៉ុណ្ណោះគឺជាកូនមនុស្សនោះហើយ 14លោកម៉ូសេបានលើកសត្វពស់ឡើងនៅទីរហោឋានយ៉ាងណានោះកូនមនុស្សនឹងត្រូវគេលើកឡើងយ៉ាងនោះដែរ 15ដើម្បីឲ្យអស់អ្នកដែលជឿលើកូនមនុស្សមានជីវិតអស់កល្បជានិច្ច 16ដ្បិតព្រះជាម្ចាស់ស្រលាញ់មនុស្សលោកដល់ម៉្លេះបានជាព្រះអង្គប្រទានព្រះរាជបុត្រាតែមួយដើម្បីឲ្យអស់អ្នកដែលជឿលើព្រះរាជបុត្រានោះមិនត្រូវវិនាសឡើយគឺឲ្យមានជីវិតអស់កល្បជានិច្ចវិញ 17ព្រោះព្រះជាម្ចាស់មិនបានចាត់ព្រះរាជបុត្រាឲ្យមកក្នុងពិភពលោកនេះដើម្បីជំនុំជម្រះពិភពលោកទេប៉ុន្តែដើម្បីឲ្យពិភពលោកទទួលបានសេចក្ដីសង្គ្រោះតាមរយៈព្រះរាជបុត្រាវិញ 18ហើយអស់អ្នកដែលជឿលើព្រះរាជបុត្រាអ្នកនោះមិនជាប់ទោសឡើយប៉ុន្តែអស់អ្នកដែលមិនជឿអ្នកនោះជាប់ទោសហើយដោយព្រោះមិនបានជឿលើព្រះនាមនៃព្រះរាជបុត្រាតែមួយរបស់ព្រះជាម្ចាស់ 19នេះជាការដាក់ទោសដ្បិតពន្លឺបានមកក្នុងពិភពលោកនេះប៉ុន្តែមនុស្សស្រលាញ់សេចក្ដីងងឹតជាងពន្លឺព្រោះការប្រព្រឹត្តិរបស់គេសុទ្ធតែអាក្រក់ 20ហើយអស់អ្នកដែលប្រព្រឹត្តិអាក្រក់គេស្អប់ពន្លឺមិនមកឯពន្លឺទេក្រែងការប្រព្រឹត្តិរបស់គេត្រូវលាតត្រដាង 21ប៉ុន្ដែអស់អ្នកដែលប្រព្រឹត្តិតាមសេចក្ដីពិតវិញគេមកឯពន្លឺដើម្បីឲ្យការប្រព្រឹត្តិរបស់គេត្រូវបានបើកសំដែងឲ្យដឹងថាគេបានធ្វើនៅក្នុងព្រះជាម្ចាស់មែន»។ព្រះយេស៊ូសរសើរលោកយ៉ូហាន
22បន្ទាប់ពីហេតុការណ៍ទាំងនេះព្រះយេស៊ូនិងពួកសិស្សរបស់ព្រះអង្គបានមកក្នុងស្រុកយូដាហើយព្រះអង្គក៏ស្នាក់នៅទីនោះជាមួយពួកគេនិងធ្វើពិធីជ្រមុជទឹកឲ្យពួកគេដែរ 23រីឯលោកយ៉ូហានគាត់ក៏ធ្វើពិធីជ្រមុជទឹកនៅអេណូនដែរគឺនៅជិតសាលីមព្រោះនៅទីនោះមានទឹកច្រើនហើយមានមនុស្សមកទទួលពិធីជ្រមុជទឹក។ 24លោកយ៉ូហានមិនទាន់ជាប់គុកទេ។ 25ពេលនោះកើតមានការជជែកដេញដោលគ្នារវាងពួកសិស្សរបស់លោកយ៉ូហាននិងជនជាតិយូដាម្នាក់អំពីពិធីជម្រះកាយ 26ដូច្នេះពួកគេក៏មកជួបលោកយ៉ូហានប្រាប់ថា៖ «លោកគ្រូអ្នកដែលបាននៅជាមួយលោកកាលនៅត្រើយម្ខាងនៃអូរយ័រដាន់គឺជាអ្នកដែលលោកបានធ្វើបន្ទាល់នោះឥឡូវនេះមើល៍គាត់កំពុងធ្វើពិធីជ្រមុជទឹកដែរហើយមនុស្សគ្រប់គ្នានាំគ្នាទៅឯគាត់»។ 27លោកយ៉ូហានតបវិញថា៖ «គ្មានមនុស្សណាម្នាក់អាចទទួលបានអ្វីទេលុះត្រាតែព្រះជាម្ចាស់ប្រទានពីស្ថានសួគ៌មក 28ហើយអ្នករាល់គ្នាផ្ទាល់ជាសាក្សីអំពីខ្ញុំកាលដែលខ្ញុំប្រាប់ថាខ្ញុំមិនមែនជាព្រះគ្រិស្ដទេប៉ុន្តែព្រះជាម្ចាស់បានចាត់ខ្ញុំឲ្យមកមុនព្រះអង្គប៉ុណ្ណោះ 29អ្នកណារៀបការនឹងកូនក្រមុំអ្នកនោះហើយជាកូនកំលោះរីឯមិត្តសម្លាញ់របស់កូនកំលោះដែលឈរស្ដាប់កូនកំលោះនោះក៏ត្រេកអរជាខ្លាំងចំពោះសំឡេងរបស់កូនកំលោះដែរដូច្នេះអំណររបស់ខ្ញុំបរិបូរហើយ 30ដ្យិតព្រះអង្គត្រូវតម្កើងឡើងឯខ្ញុំត្រូវបន្ទាបចុះវិញ 31ហើយព្រះមួយអង្គដែលយាងមកពីស្ថានលើព្រះអង្គគង់ខ្ពស់លើសទាំងអស់រីឯអ្នកដែលនៅក្នុងលោកិយនេះគេកើតពីលោកិយមកនិងនិយាយតាមរបៀបលោកិយដែរប៉ុន្តែព្រះមួយអង្គដែលយាងមកពីស្ថានសួគ៌ព្រះអង្គគង់ខ្ពស់លើសទាំងអស់ 32ព្រះអង្គធ្វើបន្ទាល់អំពីអ្វីដែលព្រះអង្គបានឃើញនិងបានឮប៉ុន្តែគ្មានអ្នកណាទទួលយកសេចក្ដីបន្ទាល់របស់ព្រះអង្គទេ 33ប៉ុន្តែអ្នកណាទទួលយកសេចក្ដីបន្ទាល់របស់ព្រះអង្គអ្នកនោះក៏អះអាងដែរថាព្រះជាម្ចាស់ពិតត្រង់ 34ដ្បិតព្រះមួយអង្គដែលព្រះជាម្ចាស់បានចាត់ឲ្យមកនោះព្រះអង្គថ្លែងពីព្រះបន្ទូលរបស់ព្រះជាម្ចាស់ដ្បិតព្រះជាម្ចាស់ប្រទានព្រះវិញ្ញាណមកដោយគ្មានកម្រិត 35គឺព្រះវរបិតាស្រលាញ់ព្រះរាជបុត្រានិងបានប្រគល់អ្វីៗទាំងអស់មកក្នុងព្រះហស្ដរបស់ព្រះរាជបុត្រា 36ដូច្នេះអ្នកណាជឿលើព្រះរាជបុត្រាអ្នកនោះមានជីវិតអស់កល្បជានិច្ចប៉ុន្តែអ្នកណាមិនស្ដាប់បង្គាប់ព្រះរាជបុត្រាអ្នកនោះនឹងមិនបានទទួលជីវិតទេផ្ទុយទៅវិញសេចក្ដីក្រោធរបស់ព្រះជាម្ចាស់នៅជាប់នឹងអ្នកនោះ»។
Copyright information for
KhmKCB